በሰይፉ ፋንታሁን አስተባባሪነት የተሰበሰበው ገንዘብ ፍሬው መቄዶንያ ደረሰ

- Advertisement -

#FastMereja I በአገር ውስጥና በውጭ አገር የሚኖሩ ኢትዮጵያውያን “ሰውን ለመርዳት ሰው መሆን በቂ ነው” በሚለው የመቄዶንያ መርህ ስር በመሰባሰብ ያደረጉት ታላቅ የገቢ ማሰባሰቢያ ድል አድራጊ ውጤቱን እያሳየ ይገኛል።

ባሳለፍነው ዓመት በጋዜጠኛ ሰይፉ ፋንታሁን አስተባባሪነት በተከናወነው ታሪካዊ የገቢ ማሰባሰቢያ መርሃ ግብር የተገኘው ገንዘብ፣ ለመቄዶንያ አዲስ ህንፃ ግንባታ ማጠናቀቂያ (Finishing) የሚውሉ ግብዓቶችን ለመግዛት ጥቅም ላይ ውሏል። በዚህም መሰረት በዛሬው ዕለት 19 ኮንቲነሮች የደረሱ ሲሆን፣ እስካሁን በአጠቃላይ 54 ኮንቲነር ቁሳቁሶች ወደ ግቢው ገብተው መራገፋቸው ታውቋል።

ይህ ግዙፍ ድጋፍ በተለይ ለህንፃው ወለል ንጣፍ የሚያገለግሉ ጥራት ያላቸው የፓርሲሊን (Porcelain) ውጤቶችን ያካተተ ነው። ላለፉት ወራት የግንባታ ግብዓቶቹ በሂደት ወደ አገር ውስጥ ሲገቡ መቆየታቸው ይታወሳል። ዛሬ የደረሱትን 19 ኮንቲነሮች ጨምሮ፣ እስካሁን ለግንባታው ማጠናቀቂያ የሚሆኑ 54 ኮንቲነር ሙሉ ቁሳቁሶች በመቄዶንያ ግቢ ውስጥ ተከማችተዋል።

ይህ ስራ በሺዎች የሚቆጠሩ ኢትዮጵያውያን በፈገግታና በደስታ የሰጡት ስጦታ ውጤት ሲሆን፣ የህንፃው ግንባታ ተጠናቆ የአቅመ ደካማ ወገኖችን መጠለያ ችግር በዘላቂነት ለመፍታት የሚደረገውን ጥረት በእጅጉ እንደሚያፋጥነው ተገልጿል። “ሰውን ለመርዳት ሰው መሆን በቂ ነው” የሚለው ብሂል በተግባር የታየበት ይህ አጋጣሚ፣ ለበጎ አድራጎት ስራው ተሳታፊ ለሆኑት ሁሉ ትልቅ የምስራች ሆኖ አልፏል።

ሚያዝያ 14 ቀን 2018 ዓ.ም.

Source: FastMereja