”የኢትዮ-ኢጣሊያ የንግድ ትስስር የ10 በመቶ ዕድገት አስመዝግቧል” በኢትዮጵያ የኢጣሊያ ኤምባሲ

- Advertisement -

#Ethiopia | በኢትዮጵያና በኢጣሊያ መካከል ያለው የንግድ ልውውጥ ካለፉት ዓመታት ጋር ሲነፃፀር የ10 በመቶ ዕድገት ማሳየቱን በኢትዮጵያ የኢጣሊያ ኤምባሲ አስታወቀ። ይህ ተስፋ ሰጪ መረጃ ይፋ የሆነው ከ20 በላይ ግዙፍ የኢጣሊያ ኩባንያዎች የሚሳተፉበት የኮንስትራክሽን ቴክኖሎጂ ኤግዚቢሽን በአዲስ አበባ ዓለም አቀፍ ኮንቬንሽን ሴንተር በተከፈተበት ወቅት ነው።

የሁለቱ ሀገራት ኢኮኖሚያዊ ትዳር ከጊዜ ወደ ጊዜ እየጠነከረ መምጣቱን የሚያሳዩ ዋና ዋና ነጥቦች የሚከተሉት ናቸው፦

-የኢጣሊያ ኩባንያዎች በኢትዮጵያ ያፈሰሱት የኢንቨስትመንት ካፒታል 723 ሚሊዮን ዩሮ ደርሷል።

-እስካሁን ድረስ 150 የሚጠጉ የኢጣሊያ ኩባንያዎች ከኢትዮጵያ አጋሮቻቸው ጋር የንግድና የኢንቨስትመንት ትስስር ፈጥረዋል።

-ጣሊያን በአፍሪካ ለምትገነባው የኢኮኖሚ ትብብር ማዕቀፍ (Mattei Plan) ስር፣ ለኢትዮጵያ የሥራ ዕድል ፈጠራና ዘላቂ ልማት 25 ሚሊዮን ዩሮ ድጋፍ አድርጋለች።

በኢትዮጵያ የኢጣሊያ ኤምባሲ የንግድ ኮሚሽነር ክላውዶ ባስካሉች እንደገለጹት፣ ይህ ኤግዚቢሽን ምርት ከመሸጥ ባለፈ ትልቅ የዕውቀት ሽግግር ግብ አለው።

ኢትዮጵያ በሯን ለዓለም አቀፍ ንግድ ክፍት ማድረጓን ተከትሎ፣ በርካታ ኩባንያዎች በግንባታ፣ በማኑፋክቸሪንግ፣ በጨርቃጨርቅና በግብርና ምርት ማቀነባበር ዘርፎች ላይ በንቃት እየተሳተፉ ይገኛሉ። ይህ ኤግዚቢሽን ጣሊያን በአፍሪካ ዋነኛ የግንባታ ማዕከል እየሆነች በመጣችው ኢትዮጵያ ውስጥ ያላትን አሻራ ይበልጥ እንደሚያሰፋው ታምኖበታል።

ይህ የቴክኖሎጂና የንግድ ድግስ በአዲስ አበባ ዓለም አቀፍ ኮንቬንሽን ሴንተር እስከ ቅዳሜ ሚያዝያ 17 ቀን 2018 ዓ.ም ድረስ ለተከታታይ ሦስት ቀናት የሚቆይ ይሆናል።

Getu Temesgen – (ጌጡ ተመስገን)
#getutemesgen #getu

Source: GetuTemesgen