ሀገሬ ቴሌቪዥን የዓለም አትሌቲክስ ውድድሮችን በብቸኝነት ለማስተላለፍ ታሪካዊ ስምምነት ተፈራረመ

- Advertisement -

#Ethiopia | ሀገሬ ቴሌቪዥን እስከ 2021 ዓ.ም የሚካሄዱ ሁሉንም የዓለም አትሌቲክስ ተከታታይ ውድድሮችን (World Athletics Series) በኢትዮጵያ በብቸኝነት በነፃ የሥርጭት ሞገድ (Free-to-Air) ለተመልካቾች ለማቅረብ የሚያስችል ልዩ ስምምነት መፈረሙን በይፋ አስታወቀ። ይህ ስምምነት ጣቢያውን እንዲህ ዓይነት አጠቃላይ መብቶችን በማግኘት ረገድ በሀገሪቱ የመጀመሪያው የግል የቴሌቪዥን ጣቢያ አድርጎታል።

በተደረገው ስምምነት መሠረት፣ ሀገሬ ቴሌቪዥን የዓለም አትሌቲክስ ሻምፒዮናን፣ የዓለም የቤት ውስጥ አትሌቲክስ ውድድርን፣ አገር አቋራጭ እና የጎዳና ላይ ሩጫን እንዲሁም የዓለም ከ20 ዓመት በታች አትሌቲክስ ሻምፒዮናዎችን በቀጥታ ለተመልካቾች ያቀርባል።

የታሪካዊው የሥርጭት መርሃ-ግብር እ.ኤ.አ በግንቦት ወር 2026 በቦትስዋና ዋና ከተማ ጋቦሮኔ በሚካሄደው የዓለም አትሌቲክስ የዱላ ቅብብል (World Athletics Relays) ውድድር በይፋ እንደሚጀመር ታውቋል።

የሀገሬ ቴሌቪዥን ዋና ሥራ አስፈፃሚ አቶ ንዋይ ይመር እንደገለጹት፣ ስምምነቱ ኢትዮጵያውያን ጀግኖች አትሌቶቻቸው በዓለም አቀፍ መድረክ ሰንደቃቸውን ከፍ ሲያደርጉ እያንዳንዱ ዜጋ ቤቱ ሆኖ በነፃ እንዲመለከትና የታሪኩ አካል እንዲሆን ለማስቻል ትልቅ ፋይዳ አለው።

የዓለም አትሌቲክስ ፕሬዝዳንት ሰባስቲያን ኮ በበኩላቸው፣ ታላቅ የአትሌቲክስ ታሪክ ያላት ኢትዮጵያ በሚሊዮን የሚቆጠሩ ዜጎቿ እነዚህን ውድድሮች በነፃ እንዲከታተሉ መደረጉ ትልቅ ደስታ እንደሚሰጣቸው ገልጸዋል።

ጣቢያው ከቀጥታ ሥርጭቱ በተጨማሪ ጥልቅ የባለሙያ ትንታኔዎችን እና የአትሌቶችን ዝግጅት የሚያሳዩ ልዩ ስፖርታዊ ፕሮግራሞችን በማካተት ለተመልካቾቹ የተሟላ መረጃ ለማድረስ ዝግጅቱን ማጠናቀቁን አስታውቋል።

Getu Temesgen – (ጌጡ ተመስገን)
#getutemesgen #getu
#HagereTV #WorldAthletics #Ethiopia #SportsNews #Athletics #SebastianCoe #BroadcastingRights #EthiopianAthletes #AddisAbaba

Source: GetuTemesgen