የቀድሞ የዛምቢያ ፕሬዝዳንት የቀብር ሥነ-ሥርዓት ውዝግብ በቤተሰቡ አሸናፊነት ተጠናቀቀ

​#FastMereja I የደቡብ አፍሪካ ጠቅላይ ይግባኝ ሰሚ ፍርድ ቤት የቀድሞ የዛምቢያ ፕሬዝዳንት ኤድጋር ሉንጉ የቀብር ቦታን የመወሰን መብት የሟች ቤተሰቦች ብቻ መሆኑን ወስኗል። ፍርድ ቤቱ ቀደም ሲል የቀድሞ ፕሬዝዳንቱን አስከሬን ለዛምቢያ መንግሥት እንዲያስረክብ የታዘዘውን የከፍተኛ ፍርድ ቤት ውሳኔ በመሻር፣ የቤተሰቡን ፍላጎት የሚያስቀድም ፍርድ ሰጥቷል።

​የዛምቢያው የቀድሞ መሪ ኤድጋር ሉንጉ ሰኔ 5 ቀን 2017 ዓ.ም በደቡብ አፍሪካ ለሕክምና በቆዩበት ወቅት ከዚህ ዓለም በሞት ተለይተዋል። ከዕለተ ሞታቸው ጀምሮ አስከሬናቸው በደቡብ አፍሪካ ሆስፒታል የቆየው፣ በቤተሰቡ እና በዛምቢያ መንግሥት መካከል በተፈጠረ የሕግ ክርክር ምክንያት ነበር።

የሟች ቤተሰቦች የቀድሞው ፕሬዝዳንት በሕይወት እያሉ በደቡብ አፍሪካ እንዲቀበሩ ፍላጎት እንደነበራቸው ገልጸው፣ የአሁኑ የዛምቢያ መንግሥት አስተዳደር በሥነ-ሥርዓቱ ላይ እንዲገኝ እንደማይፈልጉ በመግለጽ አቋማቸውን አጽንተዋል።

የዛምቢያ መንግሥት በበኩሉ፣ ሉንጉ የሀገሪቱ የቀድሞ መሪ እንደመሆናቸው መጠን በሉሳካ በሚገኘው የፕሬዝዳንቶች መካነ መቃብር በመንግሥት ወታደራዊ ክብር ሊቀበሩ እንደሚገባ በመከራከር ሕጋዊ ክስ መሥርቶ ነበር።

የደቡብ አፍሪካ ጠቅላይ ይግባኝ ሰሚ ፍርድ ቤት፣ የዛምቢያ መንግሥት የቤተሰቡን ፈቃድ ችላ ብሎ አስከሬኑን ለመውሰድ የሚያስችለው ሕጋዊ መሠረት ማቅረብ እንዳልቻለ ገልጿል። ፍርድ ቤቱ የአንድ ግለሰብ የክብርና የቤተሰብ መብት ከማንኛውም የመንግሥት ፕሮቶኮል እንደሚቀድም በመግለጽ የቤተሰቡን ውሳኔ አጽድቋል።

​የዛምቢያ መንግሥት ጉዳዩን ወደ ሕገ-መንግሥታዊ ፍርድ ቤት የመውሰድ ዕድል ቢኖረውም፣ አዲሱ የፍርድ ቤት ውሳኔ ሉንጉ በደቡብ አፍሪካ እንዲቀበሩ የሚያደርገውን ሂደት በይፋ ከፍቷል። ይህ ውሳኔ በሁለቱ ወገኖች መካከል ለአንድ ዓመት የዘለቀውን ውዝግብ በቤተሰቡ ድል አጠናቋል።


Source: FastMereja

Related Posts

በሊዮኔል ሜሲ ሁለት ጎሎች አርጀንቲና ኦስትሪያን 2 ለ 0 አሸንፏለች።

የ3 ዓመት ፍርድ ውሳኔውን ጨርሶ ከማረሚያ ቤት በወጣ በ3ኛው ቀን የስርቆት ወንጀል የፈፀመው ግለሰብ በፅኑ እስራት ተቀጣ።

- Advertisement -

You might want to listen to:

Ethio FM