በአገሪቱ የነዳጅ እጥረት እንዲከሰት አድርገዋል የተባሉ የከፍተኛ ኃላፊዎች የሙስና ክስ ሂደት እና አዳዲስ ውሳኔዎች

- Advertisement -

በኢትዮጵያ ነዳጅና ኢነርጂ ባለስልጣን እንዲሁም በኢትዮጵያ ነዳጅ አቅራቢ ድርጅት የቀድሞ ከፍተኛ ኃላፊዎች ላይ የተመሰረተው የከባድ ሙስና ወንጀል ክስ በፌደራል ከፍተኛ ፍርድ ቤት የልደታ ምድብ 3ኛ የሙስና ጉዳዮች ወንጀል ችሎት እየታየ ይገኛል። ከተከሳሾቹ መካከል የኢትዮጵያ ነዳጅና ኢነርጂ ባለስልጣን ምክትል ዋና ዳይሬክተር የነበሩት ዲባራ ፉፋ እና የኢትዮጵያ ነዳጅ አቅራቢ ድርጅት ዋና ዳይሬክተር አቶ ሹምአለም ብርሃኔ ይገኙበታል።
ተከሳሾቹ ከመመሪያ ውጪ የነዳጅ ግዥና አከፋፋይነት ፈቃድ በመስጠት፣ በመቶ ሺዎች የሚቆጠር ሊትር ናፍጣ በኮንትሮባንድ እንዲሸጥ በማመቻቸት እና ከጅቡቲ የሚመጣን በድጎማ የተገዛ ነዳጅ ከቁጥጥር ውጪ በማድረግ በገበያ ላይ ከፍተኛ የነዳጅ እጥረት እንዲከሰት አድርገዋል ተብለው ተከስሰዋል። በመንግስት ላይም በድምሩ ከ 30 ሚሊየን ብር በላይ ጉዳት ማድረሳቸው ተገልጿል።
ከዚህ ክስ ጋር በተያያዘ የተሰሙ አዳዲስ የችሎት ውሳኔዎችና ዝርዝሮች እንደሚከተለው ቀርበዋል፦
### የክስ መቋረጥ እና የተከሳሾች ቁጥር መቀነስ
በመጀመሪያ በዚሁ መዝገብ ከተካተቱት 13 ተከሳሾች መካከል የ 4 ግለሰቦች እና የአንድ የነዳጅ አቅራቢ ድርጅት ክስ እንዲቋረጥ በመደረጉ፣ በአሁኑ ወቅት ክሳቸውን በሕግ ፊት እየተከታተሉ የሚገኙ ተከሳሾች ቁጥር ወደ 9 ዝቅ ብሏል።
### የበረከት ወርቁ (በረከት ገበሬዋ) ክስ በሌለችበት እንዲታይ መወሰኑ
ፍርድ ቤቱ ከዚህ ቀደም በሰጠው ትዕዛዝ መሠረት፣ በረከት ወርቁ በጋዜጣ ጥሪ ተደርጎላት እንድትቀርብ ታዞ ነበር። በዚህም መሠረት በሰኔ 8/2018 ዓ.ም የአዲስ ዘመን እና በሰኔ 11/2018 ዓ.ም (Jun 18/2026) የኢትዮጵያን ሄራልድ ጋዜጦች ጥሪ ቢደረግላትም በችሎቱ አልተገኘችም። በመሆኑም ፍርድ ቤቱ በተሻሻለው የክስ መዝገብ በ 5 ኛ ተከሳሽነት የተካተተችው የበረከት ወርቁ የክስ ሂደት በሌለችበት እንዲቀጥል ወስኗል።

የክስ መዝገቡ በሁለት መከፈሉ
የሕዝብ ዓቃቤ ሕግ ክሱን ለይቶ እና አሻሽሎ በሁለት መዝገብ ያደራጀው ሲሆን፦

1. በመጀመሪያው የክስ መዝገብ፦ እነ ዲባራ ፉፋን ጨምሮ 6 ተከሳሾች ተካተዋል።
2. በሁለተኛው የክስ መዝገብ፦ እነ እስምአለም ምህረቱን ጨምሮ 3 ተከሳሾች ይገኛሉ።
ይህ በእንዲህ እንዳለ፣ መዝገቡ በሌላ ችሎት እንዲታይ ተመርቶ የነበረ ቢሆንም ሳይታይ በመቆየቱ ምክንያት፣ በዛሬው የችሎት ውሎ ተለዋጭ ቀጠሮ ሳይሰጠው ቀርቷል።

በዋና ወንጀል አድራጊነት የተከሰሱ አካላት እና የምስክሮች ሂደት

መንግሥት ድጎማ ያደረገበትን ነዳጅ ከጅቡቲ በመጫን 17.8 ሚሊዮን ብር በላይ ጉዳት በማድረስ እና የመንግሥትን ሥራ በማይመች አኳኋን በመምራት የተከሰሱትን ከ11ኛ እስከ 13ኛ ያሉ ተከሳሾችን በተመለከተ ምስክሮችን የመስማት ሂደት በቀጠሮው መሠረት የሚቀጥል ይሆናል።

በፌዴራል ፖሊስ የሚፈለጉ ተከሳሾች

በሌላ በኩል ፌዴራል ፖሊስ ይፈለጋሉ ብሎ ካወጣባቸው በኋላ እስካሁን በቁጥጥር ስር ያልዋሉትን ተከሳሾች (ጌታቸው አሞኘ እና አቡሽ አየለ) ፖሊስ በአድራሻቸው ፈልጎ እንዳላገኛቸው ለችሎቱ አስታውቋል። በመሆኑም ፍርድ ቤቱ በእነዚህ ተከሳሾች ላይ የጋዜጣ ጥሪ እንዲደረግ ትዕዛዝ ሰጥቷል።
የጌታቸው አሞኘ እና የአቡሽ አየለ የጋዜጣ ጥሪ ለመጠባበቅ እንዲሁም ዓቃቤ ሕግ የሚያቀርባቸውን 24 ምስክሮች ለመስማት ችሎቱ ለሐምሌ 21 እስከ 23 ቀን 2018 ዓ.ም ተለዋጭ ቀጠሮ ሰጥቷል።

Source: Yeneta Tube