እኛ የምንሄድ ትውልድ ነን ኢትዮጵያ ግን ትቀጥላለች !

- Advertisement -

#Ethiopia | የተከበራችሁ የመላው ኢትዮጵያ ሕዝብ ወኪሎች!
የአገር ባለአደራዎች!
ዛሬ በአገራዊ ምክክር አዳራሽ የተቀመጣችሁት ! በግል ስማችሁ ብቻ አይደለም።
በግል ፍላጎታችሁ ብቻም አይደለም።
ዛሬ በ130 ሚሊዮን ሕዝብ ተስፋ በታሪክ ምስክርነት እና በመጪው ትውልድ ፊት ሁላችንም ቆመናል።
ከየክልሉ ከየመንደሩ ከዓለም ዙሪያ ያለው ሕዝባችን እምነቱንና ተስፋውን ጥሎባችሁ ልኳችኋል።

ወገኖቼ!
እስቲ ለአፍታ ዝም ብለን እናስብ።
ዛሬ የምንተነፍሰውን አየር እኛ አልፈጠርነውም።
የምንረግጠውን ምድር እኛ አላበጀነውም።
ይህችን አገር በታሪክ በባህል በቋንቋ በእምነት እና በሕዝቦቿ የገነቡት ከእኛ በፊት የነበሩ ትውልዶች ናቸው።

እኛ የአገሪቱ ባለቤቶች ብቻ አይደለንም።
እኛ የተቀበልነውን አደራ ለሚመጣው ትውልድ ለማስረከብ የተመደብን ባለአደራዎች ነን።
ስለዚህ ዛሬ ራሳችንን እንጠይቅ ?
ልጆቻችን ከእኛ ምን ይወርሳሉ?
የተከፋፈለ ልብ?
የቁስል ታሪክ?
የጥላቻ ቃላት?
ወይስ…
የሰላም ባህል?
የፍትሕ መሠረት?
የመከባበር ልብ?
የአንድነት መንፈስ?
የሚለውን ውሳኔ ዛሬ እኛ እንሰጣለን።

የተከበራችሁ ወገኖቼ!
አንድ ታላቅ እውነት እናስታውስ
እኛ የምንሄድ ትውልድ ነን ::
ኢትዮጵያ ግን ትቀጥላለች !
የእኛ ዘመን ያልፋል።
የእኛ ስም ሊረሳ ይችላል።
የእኛ ወንበር በሌላ ትውልድ ይተካል።
ነገር ግን የምንተወው እሴት የምንገነባው ሰላም እና የምንዘራው መተማመን በታሪክ ውስጥ ይኖራል።
ዛሬ ታሪክ እኛን ይጠይቃል ?
“በፈተና ዘመን ምን መረጣችሁ?”
ብሎ።
መልሳችን ይህ ይሁን
ሰላምን መረጥን።
ፍትሕን መረጥን።
መተማመንን መረጥን።
ኢትዮጵያን ከጊዜያዊ ልዩነቶቻችን በላይ እናስቀድም ።
ምክንያቱም…
አገር የምንወርሰው ብቻ አይደለም።
አገር ለሚመጣው ትውልድ የምናስረክበው አደራ ነው።
የተከበራችሁ ወገኖቼ!
አሁን የምንጠይቀው ጥያቄ ለዛሬ ብቻ የሚመለከት አይደለም።
ለነገ ነው።
ለልጆቻችን ነው።
ለሚመጡት ትውልዶች ነው።
አንድ ቀን የሚመጣው ትውልድ ወደ ታሪክ መጽሐፍ ሲመለከት ዛሬን ይጠይቃል
“በዚያ ዘመን ኢትዮጵያ ፈተና ውስጥ ስትሆን ልጆቿ ምን አደረጉ?”
ብሎ ይጠይቃል።
ያን ቀን መልሳችን ምን ይሁን?
“ተለያይተው ቆሙ” እንበል?
ወይስ…
“ተለያዩ ሆነው አንድ አገር ለመገንባት ተባበሩ” እንበል?

ወገኖቼ!
አገር የሚገነባው በአንድ ቀን አይደለም።
አገር የሚጠፋውም በአንድ ቀን አይደለም።
በየቀኑ በምንመርጠው ቃል
በየቀኑ በምንወስደው እርምጃ
በየቀኑ በምናሳየው አመለካከት ይገነባል።
ስለዚህ ዛሬ የምንመርጠው ቃል ይህ ይሁን
ጥላቻ አይወርሰን ፍቅርን እናስተላልፋለን።
ፍርሃት አይመራን ተስፋን እንመርጣለን።
መከፋፈል አይገዛን በልዩነታችን ውስጥ አንድነታችንን እናጠናክራለን።
የትናንትን ቁስል እናውቃለን የነገን ተስፋ ግን እንገነባለን።
የተከበራችሁ የአገር ባለአደራዎች!
ዛሬ የተቀመጣችሁበት መቀመጫ የክብር ቦታ ብቻ አይደለም።
የኃላፊነት ቦታ ነው።
ከጀርባው የሚታየው የአንድ ሰው ስም አይደለም።
የብዙ ሚሊዮኖች ተስፋ ነው።
እንግዲህ በዚህ ታሪካዊ ጊዜ አንድ ነገር እናድርግ
ከእኛ በፊት የነበሩትን እናክብር።
ከእኛ ጋር ያሉትን እናከብር።
ከእኛ በኋላ የሚመጡትን እናስብ።
ምክንያቱም…
እኛ የምንሄድ ትውልድ ነን ።
የእኛ ዘመን ይለፍ የአገራችን ክብር ይቀጥል።
የእኛ ስም ይረሳ የሠራነው መልካም አሻራ ግን ይኑር።
ስለዚህ ዛሬ የምንተወው ታሪክ ይህ ይሁን
“በፈተና ዘመን የነበሩ ልጆቿ ኢትዮጵያን መረጡ።
ከጥላቻ ይልቅ ፍቅርን
ከመከፋፈል ይልቅ አንድነትን
ከፍርሃት ይልቅ ተስፋን መረጡ።”
እግዚአብሔር ኢትዮጵያን ይጠብቅ።
ሕዝቧን በሰላም፣ በፍትሕ በጥበብ እና በመተማመን ይመራ።
ኢትዮጵያ በክብር ትኑር።