— የአቢዘር አገር አቀፍ ንቅናቄ ተጀመረ
#Ethiopia | አዲስ አበባ — አቢዘር ማህበረሰብ አቀፍ የልማት ድርጅት (ACDO) “አንድም ወላጁን በሞት ያጣ ልጅ ወደኋላ አይቀርም፤ ተስፋን በመላው ኢትዮጵያ” በሚል መሪ ቃል አገር አቀፍ የግንዛቤ ማስጨበጫና የሀብት ማሰባሰብ ዘመቻ መጀመሩን አስታወቀ።
ዘመቻው በመጪው የትምህርት ዘመን 5,000 የሚያህሉ ወላጆቻቸውን ያጡና ተጋላጭ የሆኑ ህፃናትን በትምህርት ቁሳቁስ ለማገዝ ያለመ ነው። ዋና ዓላማውም ህፃናቱ በቁሳቁስ እጥረት ምክንያት ከትምህርት ገበታ እንዳይርቁ ማድረግ ነው።
እንቅስቃሴው በ10 ወረዳዎች የሚካሄድ ሲሆን፣ ከነሐሴ 10 ቀን ጀምሮ የመስክ ጉዞው እንደሚጀምር ድርጅቱ ገልጿል። የሚሰበሰቡና የሚሰራጩት የትምህርት ቁሳቁሶች ደብተር፣ ቦርሳ፣ ዩኒፎርምና ሌሎች የመማሪያ አቅርቦቶችን ያካትታሉ።
የድርጅቱ መስራችና ዋና ሥራ አስኪያጅ አቶ ጀማል አብዱ የዘመቻው መሪ ቃል በጥልቅ እንደሚነካቸው ገልጸዋል። እሳቸውም ወላጆቻቸውን ያጡ ህፃናትን በማሳደግ ያሳለፉት ልምድ እነዚህ ህፃናት ትምህርታቸውን ለመቀጠል የሚያልፉበትን ተጋድሎ በቅርበት እንዲረዱ እንዳደረጋቸው ተናግረዋል።
«“የአንድ ማህበረሰብ ጥንካሬ የሚለካው በህንፃዎቹ ቁጥር ሳይሆን፣ ለተጋላጮቹ በሚሰጠው መጠለያና ጥላ ነው” ብለዋል።»
አቶ ጀማል፣ አዲሱ የትምህርት ዘመን ሲቃረብ አንድም ልጅ በትምህርት ቁሳቁስ እጥረት ምክንያት ከትምህርት እንዳይገለል ማድረግ የሁሉም ማህበረሰብ ኃላፊነት መሆኑን አሳስበዋል።
የዘመቻው ፕሮግራም ማኔጀር አቶ ወልደቴንሳይ ደሳለኝ በበኩላቸው፣ ንቅናቄው በስድስት ምዕራፎች የሚካሄድ ሲሆን 60 የተለያዩ ከተሞችን እንደሚያካትት ገልጸዋል።
የመጀመሪያው የመስክ ጉዞም ከአዳማ እስከ ጅጅጋ ባሉ 10 ዋና ከተሞች ይካሄዳል። እነሱም አዳማ፣ አዋሽ 7፣ ጭሮ፣ ሂርና፣ ጨለንቆ፣ ድሬዳዋ፣ ዓለማያ፣ አወዳይ፣ ሐረርና ጅጅጋ ናቸው።
በመስክ ላይ ከሚካሄዱ ተግባራት መካከል የብስክሌትና የሞተር ሰልፎች፣ የዶክመንተሪ ማሳያዎች፣ የቀጥታ ዲጂታል ስርጭቶችና ግልጽ የቁሳቁስ ክፍፍል ይገኙበታል። ተቋሙ ድጋፉ በትክክል ለሚገባቸው ህፃናት እንዲደርስ ከየዞኑና ወረዳው የሴቶችና ማህበራዊ ጉዳይ ጽህፈት ቤቶች፣ ከትምህርት መምሪያዎችና ከማህበረሰብ መሪዎች ጋር እየሰራ መሆኑንም ገልጿል።
ዘመቻው ከ100 ብር ጀምሮ የሚደረጉ አነስተኛ ወርሃዊ መዋጮዎችን በማስተባበር ከ2,000 እስከ 3,000 የሚደርሱ አገር በቀል ዘላቂ ደጋፊዎችን ለማፍራትም እየሰራ ነው።
አቢዘር ማህበረሰብ አቀፍ የልማት ድርጅት በ2019 ዓ.ም. ጥቅምት 28 ቀን የተመሰረተ ሲሆን፣ በአሁኑ ወቅት 234 ወላጅ አልባ ህፃናትን ሙሉ ኃላፊነት ወስዶ እያሳደገ መሆኑን ገልጿል።
ተቋሙ በ“Shield & Seed — ከለላ እና ዘር” ስትራቴጂው መሰረት ወርሃዊ የምግብ ድጋፍ፣ የህክምና መድህን (CBHI)፣ የስነ-ልቦና ድጋፍ፣ ለአረጋውያንና ተፈናቃዮች ድጋፍ፣ እንዲሁም ለወጣቶች የሙያ ስልጠናና የስራ ማስጀመሪያ ካፒታል የማመቻቸት ስራዎችን እያከናወነ መሆኑን ገልጿል።
የአቢዘር አመራሮች በመጨረሻም ተቋማትና የንግድ ድርጅቶች በኮርፖሬት ማህበራዊ ኃላፊነት (CSR) ፕሮግራሞቻቸው በኩል በትምህርት ቁሳቁስ ድጋፍና በወጣቶች የስራ ዕድል ፍጠራ ላይ በንቃት እንዲሳተፉ ጥሪ አቅርበዋል።
“አንድም ልጅ ወደኋላ አይቀርም” የሚለው የዘመቻው መልዕክትም የማህበረሰብ አብሮነትን፣ የህፃናትን ክብርና የትምህርት ዕድልን በጋራ ለመጠበቅ ያለመ ጥሪ ሆኗል።
Source: GetuTemesgen
No comments yet.