🙏
ጌታችን ምሥጢረ መለኮቱን የገለጠበት ብርሃንና በረከት ዘወትር ከሁላችን ጋር ይሁን!
በዓለ ደብረ ታቦር ከጌታችንና ከመድኃኒታችን ከኢየሱስ ክርስቶስ 9ኙ ዓበይት በዓላት አንዱ ሲሆን፤ በየዓመቱ ነሐሴ 13 ቀን በታላቅ መንፈሳዊ ሥርዓትና ደስታ ይከበራል። “ቡሄ” ማለት “ብራ፣ ገላጣ ወይም ብርሃን” ማለት ነው። ይህ ስያሜ የተሰጠው ጌታችን በታቦር ተራራ ላይ መለኮታዊ ክብሩንና ብርሃኑን የገለጠበትን ዕለት በማስመልከት ነው።
ቅዱስ ወንጌል እንደሚያስተምረን፤ ጌታችን ሦስቱን ደቀ መዛሙርት (ጴጥሮስን፣ ያዕቆብንና ዮሐንስን) ይዞ ወደ ደብረ ታቦር ተራራ ወጣ። በዚያም መልኩ በፊታቸው ተለወጠ፤ ፊቱ እንደ ፀሐይ በራ፤ ልብሱም እንደ ብርሃን ነጭ ሆነ። ከብሉይ ኪዳን ወገን ነቢያት የሆኑት ቅዱስ ሙሴና ቅዱስ ኤልያስ መጥተው ከጌታ ጋር ሲነጋገሩ ታይተዋል። ይህም ሞት የሰው ልጅ መጨረሻ እንዳልሆነና የሕያዋንና የሙታን አምላክ ክርስቶስ መሆኑን ያስረዳናል። ነቢየ እግዚአብሔር ኢሳይያስም “ኑ ወደ እግዚአብሔር ተራራ፣ ወደ ያዕቆብ አምላክ ቤት እንውጣ” በማለት ይህንን ቅዱስ ተራራ አስቀድሞ ትንቢት ተናግሮለታል (ኢሳ 2፥3)።
በዚህ ታላቅ ምሥጢር ወቅት ከደመና ውስጥ “የምወደው ልጄ ይህ ነው፤ እርሱን ስሙት” የሚል የአብ ድምፅ ተሰምቷል። ሐዋርያትም ከድምፁ ግርማ የተነሳ ደንግጠው በግንባራቸው ወድቀዋል። ዛሬ ሕፃናት ጅራፍ የሚያጮኹት ያንን የእግዚአብሔር አብን የድምፅ ግርማ ለማስታወስ ነው። በዓሉ ባህላዊና ማኅበራዊ ውበትም አለው፤ እናቶች ለሕፃናት “ሙልሙል ዳቦ” ያዘጋጃሉ፤ እረኞች በብርሃኑ ምሳሌ ችቦ ያበራሉ። በአገራችን ክረምቱና ጭጋጉ አልፎ፣ ወደ ማራኪው የበልግና የመፀው ብርሃን መሸጋገሪያችን በመሆኑ “ቡሄ ከዋለ የለም ክረምት” ይባላል።
የዚህ ታላቅ በዓል ባለቤትና የብርሃን ምንጭ የሆነው አምላካችን በረከቱንና ረድኤቱን ያድለን። ገዳማውያን አባቶቻችንና እናቶቻችን ይህንን መለኮታዊ ብርሃን በጸሎታቸውና በትሕትናቸው እያሰቡ ዘወትር በበዓታቸው ይማጸናሉ። እኛም በዚህ በተቀደሰ ዕለት የጌታችንን ታሪክና በዓል እያሰብን፣ ገዳማትን በመደገፍና በዓታቸውን በማጽናት የበረከታቸው ተሳታፊ እንሁን።
ሙትአንሳ ማር ቅዱስ ሚካኤል አንድነት ገዳምን ለመደገፍ፦
የኢትዮጵያ ንግድ ባንክ (CBE)
CBE: 1000442598391
አቢሲኒያ ባንክ (BoA)
Abyssinia: 141029444
የገዳሙ ስልክ ቁጥሮች፦
📞 0918077957
📞 0938644444
Source: FastMereja
Related Posts
No comments yet.